Skip to main content

Speeches

Speech by URA Managing Director, Mr C S Wai, at a finale event for the URA/TWGHs' Young Leaders Programme (Chinese only)

蘇祐安總監、各位校長、老師、同學:

大家好!好開心今日我地又見面啦。仲記得喺三月嘅啟動禮上時,大家隊型十足,好有衝勁,向我地展現左你哋嘅團隊精神及口號,為「才能展現 起動傳愛」青年領袖計劃,展開序幕。

喺剛才嘅短片睇到,大家過去六個月真係好充實,一方面透過「領袖才能工作坊」裝備自己,喺領導才能、項目管理能力,溝通和演說技巧同人際關係等多方面,提升能力;另一方面更身體力行, 走入深水埗、旺角、九龍城、黃大仙、葵涌、荃灣同灣仔等多個舊區,去探索認識自己學校身處嘅社區;然後設計同推行義工服務計劃,服務區內有需要嘅人士,照顧長者同精神病康復者;亦為有需要人士預備飯盒等。

另外,同學親手為自己隊伍設計嘅Facebook專頁推廣自己嘅社區,當中睇到你哋嘅用心同創意。

我剛才嚟到,睇到大家喺今日嘅「終極實力大比拼」壓軸活動中,駛出渾身解數,透過互動攤位遊戲向公眾介紹、推廣自己嘅社區,務求爭取市民投自己隊伍一票,剛才各隊伍嘅表現確實令人眼前一亮。我期待一陣間各隊伍嘅分享。

你地每一位都係社會未來嘅楝樑,「才能展現 起動傳愛」就係希望發展培育你地多方面嘅才能,成為新一代嘅青年領袖,好似樹木經悉心培植後能得以茁壯成長。講起樹木,唔知大家有冇留意到,呢到嘅公共空間種植咗三棵土沉香樹,係市建局早前從郊外移植到這裡嘅。土沉香樹有一股芳馥嘅香氣,給予人祥和嘅感覺。我地希望將呢種氣氛帶到我們嘅項目內。一陣間大家可以去欣賞下。

今次能夠成功舉辦呢項有意義嘅青年領袖計劃,我特別要感謝東華三院嘅支持。我亦要多謝東華三院教育科,各位校長,以及老師嘅帶領同參與,為呢個計劃提供好多寶貴意見。我期望呢個計劃可以延續落去,發揮青年人探索、關愛、服務同推廣社區嘅精神,建構一個共融和諧社會。

多謝大家!

(完)